اسلام آباد (بيورو رپورٽ)اليڪشن ڪميشن آف پاڪستان ملڪ ۾ ووٽرن جي مجموعي انگ جا تفصيل جاري ڪري ڇڏيا. ان ڏس ۾ ڪالهه اليڪشن ڪميشن طرفان جاري ڪيل انگن اکرن موجب ملڪ ۾ ووٽرن جو انگ 12 ڪروڙ 11 لک 99 هزار 970 آهي، جنهن ۾ مرد ووٽرن جو انگ 6 ڪروڙ 65 لک 6 هزار 171، جڏهن ته عورت ووٽرز جو انگ 5 ڪروڙ 46 لک 93 هزار 799 آهي. انگن اکرن موجب پنجاب ۾ ووٽرن جو انگ 6 ڪروڙ 90 لک 49 هزار 301 آهي، جڏهن ته سنڌ ۾ 2 ڪروڙ 55 لک 82 هزار 625 رجسٽرڊ ووٽر آهن. اليڪشن ڪميشن ٻڌايو آهي ته خيبر پختونخوا ۾ ووٽرن جو انگ 2 ڪروڙ 6 لک 11 هزار 248 ۽ بلوچستان ۾ 50 لک 47 هزار 426 آهي. اهڙي ريت اسلام آباد ۾ اهل ووٽرن جو انگ 9 لک 9 هزار 370 ٻڌايو ويو آهي.
