ميهڙ: سنڌ ۾ ڌارين جي آبادڪاري، ميهڙ ۽ خيرپورناٿن شاھه تعلقن مان ٻوڏ جو پاڻي نيڪال نه ٿيڻ ۽ شھر ۾ وڌندڙ بدامني خلاف ميهڙ ۾ عوامي تحريڪ جي مرڪزي صدر لعل جروار، مرڪزي جنرل سيڪريٽري نور احمد ڪاتيار، ايڊووڪيٽ ساجد علي مهيسر، نور بانو ملاح، ضلعي صدر ايڊووڪيٽ نجيب الرحمان مهيسر، ايڊووڪيٽ ذوالفقار چانڊيو ۽ ٻين جي اڳواڻي ۾ تعلقي اسپتال جي گيٽ کان سوين ڪارڪنن ريلي ڪڍي مختلف رستن جو گشت ڪري مک چوڪ گهنٽا گهر تي مظاهرو ڪيو، جنهن دوران احتجاج جلسي ۾ تبديل ٿي ويو. ان موقعي تي عوامي تحريڪ جي مرڪزي صدر لعل جروار، نور احمد ڪاتيار، نور بانو ملاح، ايڊوووڪيٽ نجيب الرحمان مهيسر ۽ ٻين خطاب ڪندي چيو ته هڪ سوچيل سمجهيل سازش تحت حڪمران سنڌ ۾ بهاري، بنگالي ۽ برمين کي آباد ڪري سندن ڊوميسائيل ٺھرائي ڪراچي ۾ سنڌي ماڻھن کي اقليت ۾ تبديل ڪرڻ جي ڪوشش ڪن پيا، جيڪو شرمناڪ عمل آھي. هنن وڌيڪ چيو ته سنڌ ۾ حڪمرانن جي ناقص پاليسي سبب هڪ طرف سنڌ قدرتي ۽ معدني وسيلن سان مالامال هجڻ باوجود به ملڪ ۾ مهانگائي، بيروزگاري، بدامني، بجلي ۽ گئس جي لوڊشيڊنگ ۽ بک بدحالي سبب عوام سخت پريشان آھي ته ٻئي طرف نوڪريون نه ملڻ ڪرڻ ڪري ڊگري يافتا نوجوان وڏيرن جي اوطاقن ۽ سرڪاري آفيسن جي درن جا چڪر ڪاٽي خودڪشيون ڪرڻ تي مجبور آھن. 2010ع جي مها ٻوڏ کانپو 2022 جي هٿرادو آيل برساتي ٻوڏ دادو ضلعي جي ميهڙ، خيرپورناٿن شاھه ۽ جوهي تعلقن ۾ وڏي تباهي آندي آهي، جنهن کي 3 مهينا گذرڻ باوجود حڪمرانن پرڏيهي امداد جي آسري ۾ ٻوڏ جو پاڻي نيڪال ناهي ڪرايو، جنهن سبب اڃا تائين هزارين ٻوڏ متاثر خاندان دربدر ۽ مختلف بيمارين وگهي مري رهيا آھن. هنن وڌيڪ چيو ته سنڌ جا وڏا شھر دهشتگردن ۽ ننڍن شھرن ۾ ڌاڙيلن جو راڄ قائم آهي، جنهن سبب ڪاروباري ۽ واپاري ماڻھو محفوظ ناهن. سنڌ ۾ امن جي بحالي ۽ قوم جي حقن جي حاصلات لا جدوجهد جاري رکي ويندي. ان موقعي تي عوامي تحريڪ اڳواڻ ايڊووڪيٽ ذوالفقار چانڊيو، ايڊووڪيٽ عبدالخالق ٻگهيو، ھاري اڳواڻ غلام مصطفى چانڊيو، ايڊووڪيٽ ذوالفقار ميراڻي، علي حسن وڪو، ايڊووڪيٽ منصور چانڊيو ۽ ٻين پڻ خطاب ڪيو.
