صالح پٽ: صالح پٽ لڳ ڳوٺ صاحب ڏنو ڀنڀرو ۾ نارا ڪئنال مان نڪري آيل واڳون جي ٻچڙي کي ڳوٺاڻن پڪڙي جنگلي جيوت جي اهلڪارن حوالي ڪري ڇڏيو. ان حوالي سان ڳوٺ صاحب ڏنو ڀنڀرو جي رهواسي سهراب ڀنڀرو ٻڌايو ته اسان جي ڳوٺ ٻاهران هن مهل تائين بارشن جو پاڻي موجود آهي، نارا ڪئنال جي ليفٽ سائيڊ مان واڳون نڪري برساتن جي بيٺل پاڻي ذريعي اسان جي ڳوٺ ڏانهن اچن ٿا، واڳون ڪجهه ڏينهن اندر اسان جون 2 ڪڪڙيون ۽ هڪ ٻڪر کائي ويا هئا، اسان چار فوٽ ڊگهو واڳون جو ٻچو ڳوٺ ٻاهران فصل ۾ جهلي جنهگلي جيوت جي اهلڪار پيرل چاچڙ حوالي ڪيو آهي. جڏهن ته اهلڪار پيرل چاچڙ ٻڌايو ته ڳوٺاڻن جي مدد سان واڳون جو ٻچو پڪڙيو آهي، جنهن کي ڪنهن محفوظ هنڌ تي آزاد ڪيو ويندو.
