دنيا ۾ ٽيسٽ ڪرڪيٽ 94 سالن تائين جنون جي حد تائين راڄ ڪيو، جنهن بعد ون ڊي ان ۾ جدت آندي، پر ٽي 20 جي فارميٽ ڪرڪيٽ ۾ عشق ۽ جذبات جو طوفان داخل ڪري ڇڏيو، جنهن جي نتيجي ۾ نھ رڳو هن راند ۾ نئون ٽيلنٽ وڏي تيزي سان داخل ٿيو، پر ان سان گڏ دولت جي جي ريل پيل ان جي مقبوليت کي چار چنڊ لڳائي ڇڏيا. اهڙي ريت ڪرڪيٽ ۾ هر روز نئين دريافت جو سفر شروع ٿي ويو،
ڪرڪيٽ جي ڪجهه بورڊ ٽي 10 کي شامل ڪيو، ڳالهه اتي نھ بيٺي انگلينڊ ۾ 100 بالن واري “دي 100” جي جدت داخل ڪرڻ جو تجربو ڪيو آهي، هاڻ ويسٽ انڊيز ان ۾ ٽي 60 يعني 6 رانديگرن تي ٻڌل ٽيم جو فارميٽ متعارف ڪرائي ڪرڪيٽ جي دنيا ۾ ٿرٿلو مچائي ڇڏيو آهي. ويسٽ انڊيز بورڊ جي دعوا آهي تھ هي فارميٽ انتهائي تيز رفتار فارميٽ ثابت ٿيندو. اڳوڻي ٽيسٽ ڪرڪيٽر بازيد خان چوي ٿو تھ ڪرڪيٽ ۾ ايندڙ نين جدتن کي روڪڻ بيوقوفي آهي، ڇوتھ نواڻ سان وڙهي نٿو سگهجي، مختصر فارميٽ ۾ پيسو آهي،
براڊڪاسٽر ۽ رانديگر خوش آهن. تجزيي نگار عثمان سميع انگلينڊ جي اڳوڻي ٽيسٽ ڪرڪيٽر ڊيوڊ لائيڊ جو جملو ٻڌايو تھ هاڻ اهو ڏينهن پري ناهي، جڏهن ڪپتان ٽاس ڪرڻ ويندا ۽ جيڪو ٽاس کٽيندو، اهو ميچ جو فاتح قرار ڏنو ويندو. (فيچر: بي بي سي)
