آل رائونڊر مارڪس اسٽوئنس صرف 18 بالن تي 59 رنسن جي طوفاني اننگز ذريعي آسٽريليا کي ٽي ٽوئنٽي ورلڊ ڪپ سپر-12 مرحلي ۾ پهرين ڪاميابي ڏياري ڇڏي، جڏهن ته ايشين چئمپين سريلنڪا کي 7 وڪيٽن تان شڪست جو منهن ڏسڻو پيو. پرٿ جي ميدان ۾ ميزبان آسٽريليا جي ڪپتان ايرون فنچ ٽاس کٽي پهرين فيلڊنگ جو فيصلو ڪيو ته سريلنڪن ٽيم مقرر 20 اوورن ۾ ڇهن وڪيٽن جي نقصان تي 157 رنسون ٺاهي سگهي، جنهن ۾ اوپنر نسانڪا 40، اسالانڪا 38 ۽ ڌننجيا ڊي سلوا 26 رنسن سان نمايان رهيا. آسٽريليا طرفان جوش هيزل ووڊ، پيٽ ڪمنز، مچل اسٽارڪ، گلين ميڪسويل ۽ ايشٽن ايگر هڪ هڪ وڪيٽ وٺي سگهيا. جواب ۾ ڪينگرو بئٽر پاور پلي جي 6 اوورن ۾ ڪا بائونڊري نه لڳائي سگهيا، وارنر جي تڪڙي آئوٽ ٿيڻ بعد ڪپتان ايرون فنچ 31 ۽ ميڪسويل 12 بالن تي ٻن چوڪن ۽ ٻن ڇڪن جي مدد سان 23 رنسون ٺاهي سهارو ڏنو. ميڪسويل جي پويلين واپسي بعد مارڪس اسٽوئنس سريلنڪن بالرن تي ڪڙڪي پيو، هن فقط 18 بالن تي 59 رنسون ٺاهيون، جنهن ۾ 6 ڇڪا ۽ 4 چوڪا شامل هئا. اسٽوئنس ٽي-20 ورلڊڪپ جي تاريخ ۾ ٽئين تيز ترين ففٽي اسڪور ڪئي ۽ آسٽريليا کي 17 هين اوور ۾ ايونٽ جي پهرين سوڀ ڏياري، جنهن تي آل رائونڊر کي پليئر آف دي مئچ قرار ڏنو ويو.
