مڪه مڪرمه: شيخ محمد بن عبدالڪريم عيسيٰ حج جي خطبي ۾ مسلمانن کي مخاطب ٿيندي چيو آهي ته اسلامي قدرن جي تقاضا آهي جيڪي شيون نفرت جو سبب بڻجن ان کان پري ٿي وڃو. مسجد نمرا ۾ حج جو خطبو ڏيندي شيخ محمد بن عبدالڪريم چيو ته الله تقويٰ اختيار ڪرڻ جي هر هر هدايت ڪئي آهي، تقويٰ اختيار ڪرڻ وارو الله جو قرب حاصل ڪري ٿو ۽ الله فرمايو ته متقي لا جنت جي خوشبري آهي. رابطا عالم اسلامي جي سيڪريٽري جنرل شيخ محمد بن عبدالڪريم العيسيٰ خطبي ۾ چيو ته الله کانسواءِ ڪوبه معبود ناهي، محمدﷺ الله جو آخري رسول ۽ ٻانهو آهي، پاڻﷺ کانپوءِ نبوت جو سلسلو بند ٿي چڪو آهي. هن حج جي خطبي ۾ چيو ته اسلامي قدرن جي گُهرج آهي ته جيڪي شيون نفرت جو سبب بڻجن انهن کان پري ٿي وڃو، الله تعاليٰ کان ڊڄو ۽ ڊڄڻ ۾ ئي ڪاميابي آهي، تقويٰ اختيار ڪندڙ الله تعاليٰ جو قرب حاصل ڪري ٿو، اوهان جي مصيبت الله تعاليٰ کان سواءِ ڪوبه ختم نٿو ڪري سگهي، نيڪي ڪرڻ ۾ هميشه جلدي ڪريو، نبي ڪريمﷺ جن فرمايو ته قيامت جي ڏينهن منهنجي ويجهو اهي هوندا جن جو اخلاق سٺو هوندو، مسلمانؤ روزا رکو، زڪواة ڏيو ۽ نماز ادا ڪريو، الله تعاليٰ وحدهٗ لاشريڪ آهي، ان کانسواءِ ڪوبه عبادت جي لائق ناهي، ان جي ئي عبادت ڪرڻ گهرجي، الله تعاليٰ کان ڊڄندا رهو ۽ پنهنجي نمازن جي حفاظت ڪريو. شيخ محمد بن عبدالڪريم حج جي خطبي ۾ چيو ته سمورا مسلمان پاڻ ۾ ڀائر آهن، انهن کي گهرجي ته پاڻ ۾ ڀائيچاري سان رهن، اُمت مسلمه کي هن وقت اتفاق ۽ اتحاد جي ضرورت آهي، نيڪي جي ڪمن ۾ اڳرائي ڪريو ۽ بُرائيءَ کان بچو، هر شخص سُڃاڻي وٺي ته الله تعاليٰ وحدهٗ لاشريڪ آهي، ان کانسواءِ ڪوبه معبود ناهي ۽ هو هر شيءِ تي قادر آهي، ان جي عبادت ڪرڻ گهرجي.
