فرانس سان تعلق رکندڙ ليکڪا ايني ايرنو سال 2022ع لا ادب جو نوبل انعام کٽي ورتو آهي. ادب جي نوبيل انعام جي فاتح جو فيصلو 18 رڪني سوئيڊش اڪيڊمي ڪيو آهي، جنهن ۾ ڪنهن به ليکاري جي سڄي حياتي جي ادبي پورهئي کي نظر ۾ رکيو ويندو آهي. هن ڀيري فرانسيسي ليکڪا ايني ايرنو کي ادب جو نوبل انعام ڏيڻ جو اعلان ڪيو ويو، جيڪا انساني زندگي سان لاڳاپيل واقعن ۽ حادثن کي ناول جو روپ ڏيندي آهي ۽ پنهنجي ملڪ جي مڃيل ليکڪا آهي. 1940ع ۾ جنم وٺندڙ ايني ايرنو ننڍپڻ هڪ ننڍڙي علائقي يووٽوٽ ۾ گذاريو ۽ پنهنجي تعليم رائوين يونيورسٽي مان حاصل ڪئي، جنهن بعد سيڪنڊري اسڪول ۾ استاد طور خدمتون ڏنيون. هن 1977ع کان 2000ع تائين هڪ يونيورسٽي ۾ پروفيسر طور ڪم ڪيو. ايني ايرنو جو پهريون ناول 1974ع ۾ منظرعام تي آيو پر کيس چوٿين ناول “مينز پليس” تمام گهڻي مقبوليت ڏياري. ايني ايرنو جا لکيل ٻه ناول “اي مينز پليس” ۽ “اي وومينز اسٽوري” فرانس ۾ ڪلاسڪ جو درجو رکن ٿا.
