سجاول ۾ ماستري لاءِ آئي بي اي ٽيسٽ ڏيندڙ اميدوارن سجاول ضلعي کي ھارڊ ايريا قرار ڏيڻ لاءِ مظاهرو ڪيو. ان موقعي تي ونيش ڪمار، فياض احمد پرھياڙ، عنايت زئور، عبدالواحد ممبراڻي، شبير احمد ميمڻ، صاحب ڏنو ملاح، نويد خاصخيلي، نثارشاهه، جاويد زئور ۽ ٻين چيو ته تازو آئي بي اي پاران جي اي ايس ٽي ۽ پي ايس ٽي جي ٽيسٽ ۾ سجاول ضلعي مان پوري سنڌ ۾ سڀ کان گھٽ اميدوار پاس ٿيا آهن. جي اي ايس ٽي جي 838 خالي جاين مان صرف 17 اميدوار پاس ٿي سگھيا يعني 98سيڪڙو جايون بچي پونديون. جڏهن ته پي ايس ٽي جي 277 خالي جاين مان فقط 100 جي لڳ ڀڳ اميدوار پاس ٿيا آهن جنهن ۾ 60 سيڪڙو جايون اڃا خالي رھن ٿيون. هنن چيو ته سجاول پوري سنڌ ۾ تعليم جي شرح جي لحاظ کان آخري نمبر تي آهي، استادن جي مقرري نه ٿيڻ ڪري اڪثر اسڪول بند آهن.
