آمريڪي سيڪريٽري آف اسٽيٽ جي صلاحڪار ڊيرڪ شولي اڳوڻي وزيراعظم عمران خان جي سازش وارن الزامن کي ڪوڙو قرار ڏيندي چيو آهي ته تحريڪ انصاف چيئرمين جي الزام ۾ ڪا سچائي ناهي. هڪ انٽرويو ۾ ڊيرڪ شولي چيو ته پاڪستان اهم ملڪ آهي، اتي ڀلي ڪهڙي به حڪومت هجي ان سان لاڳاپا ۽ سهڪار جاري رهندو، آمريڪا جا پاڪستان سان گهرا لاڳاپا آهن ۽ اهي رڳو افغانستان تائين محدود نه آهن، سيڪيورٽي ۽ اقتصادي سهڪار ۽ ٻوڏ سٽيل ماڻهن لاءِ امداد آمريڪي عزم جو اظهار آهي. ڊيرڪ شولي وڌيڪ چيو ته دهشتگردي جي خاتمي واري آپريشن ۾ پاڪستان اسان جو اهم حمايتي آهي، پاڪستان ۽ آمريڪا وچ ۾ مضبوط فوجي سهڪار آهي، افغانستان کانسواءِ به دهشتگردي کي منهن ڏيڻ اسان جي گڏيل مفاد ۾ آهي، اميد ته اڳتي به دهشتگردي خلاف آپريشن ۾ پاڪستان جو ساٿ حاصل رهندو. هڪ سوال جي جواب ۾ هن چيو ته آمريڪا ڪڏهن به پاڪستان کي پابند ناهي ڪيو ته چين ۽ آمريڪا مان ڪنهن هڪ جي چونڊ ڪئي وڃي، هر ملڪ کي پنهنجي چونڊ ۽ فيصلن جو اختيار هجڻ جا حامي آهيون، واشنگٽن کي ڪڏهن به چين جي مقابلي جو ڊپ ناهي رهيو، اسان شفاف مقابلو چاهيون ٿو.
