سنجهورو: سنجهورو ٿاڻي جي حد سانگهڙ-شھدادپور روڊ تي ڳوٺ ميتلا اسٽاپ وٽ لينڊ ڪروزر ۽ موٽرسائيڪل ۾ ٽڪر ٿي پيو، جنهن سبب موٽرسائيڪل سوار ڳوٺ ڪريم ڏنو وساڻ جا رھواسي 70 سالن جو عثمان لغاري ۽ سندس 18 سالن جو نوجوان پوٽو بابر لغاري موقعي تي فوت ٿي ويا، ٻنهي فوتين جا لاش شھدادپور جي سرڪاري اسپتال آندا ويا، جتان ضروري ڪارروائي بعد مڙهه وارثن حوالي ڪيا ويا، جيڪي ڳوٺ ڪريم ڏنو وساڻ آندا ويا ته ڪهرام مچي ويو. فوتي نوجوان بابر لغاري جا والدين بيهوش ٿي ويا. ڏاڏي ۽ پوٽي کي جنازي نماز بعد اباڻي قبرستان ۾ مٽي ما حوالي ڪيو ويو. جڏھن ته لينڊ ڪروزر جو ڊرائيور حربيار لغاري پڻ زخمي ٿي پيو، جنهن کي اسپتال داخل ڪيو ويو. ٻئي طرف سنجهورو پوليس لينڊ ڪروزر ۽ موٽرسائيڪل کي تحويل ۾ ورتو. حادثي جو ڪيس داخل نه ٿي سگهيو. لينڊ ڪروزر ڳوٺ الهداد لغاري جي رهواسي فوجي حسن علي لغاري جي ٻڌائي پئي وڃي.
