اسلام آباد : قومي اسيمبلي سپريم ڪورٽ جي فيصلن ۽ شقن تي نظرثاني ۽ نيب چيئرمين جي اختيارن ۾ واڌ بابت بل اتفاق راءِ سان منظور ڪري ورتو. بل تحت آرٽيڪل 3/184 تحت سپريم ڪورٽ جي جيڪا بينچ فيصلو ٻڌائيندي، ان جو جائزو وٺڻ لاءِ وڏي بينچ جوڙي ويندي. درخواستگذار کي اختيار هوندو ته هو نظرثاني لاءِ پنهنجي پسند جو نمائندو مقرر ڪري، نظرثاني جي درخواست ان قانون جي منظوري جي سٺ ڏينهن اندر داخل ڪرڻي پوندي. قومي اسيمبلي مان منظور ڪيل نيب ترميمي بل تحت نيب چيئرمين کي وڌيڪ اختيار ڏنا ويا. ڪالهه قومي اسيمبلي جو هنگامي اجلاس راجا پرويز اشرف جي صدارت هيٺ ٿيو. اجلاس ۾ ضمني ايجنڊا جي حصي طور وزيراعظم جي خاص مددگار شيزا فاطمه سپريم ڪورٽ ريويو آف ججمينٽ اينڊ آرڊر 2023ع ايوان ۾ پيش ڪيو. بل جي منظوري کان اڳ جنهن جي خلاف فيصلو ڏنو ويو هجي، ان کي به اهو حق حاصل هوندو ته هو ترميم جي درخواست داخل ڪري سگهي. بل تحت ترميم جي درخواست هن قانون جي منظوري جي سٺ ڏينهن اندر داخل ڪرڻ لازمي آهي. بل جو مقصد سپريم ڪورٽ جي دائري اختيار کي وڌائڻ آهي، جيڪو سپريم ڪورٽ، هاءِ ڪورٽ سميت سمورن عدالتن تي لاڳو ٿيندو. اجلاس ۾ نيب چيئرمين جي اختيارن ۾ واڌ بابت نيب ترميمي بل 2023 جي به منظوري ڏني وئي، بل وزير اعظم نذير تارڙ پيش ڪيو، نيب ترميمي بل 1999ع کان لاڳو ٿيندو. سڀني التوا واري انڪوائريون جن کي ذيلي سيڪشن 3 تحت منتقل ڪرڻ جو ارادو ڪيو ويو آهي انهن تي چيئرمين نيب پاران غور ڪيو ويندو. نيب چيئرمين کي اختيار هوندو ته هو ڪنهن ٻئي قانون تحت شروع ڪيل انڪوائري کي بند ڪري، چيئرمين کي اختيار هوندو ته هو اهڙيون سموريون انڪوائريون لاڳاپيل اداري، اداري يا اٿارٽي کي حوالي ڪري.
