اسلام آباد :سينيٽ ۾ رسول الله صلي الله عليه وآله وسلم جي گهروارن، اصحابن سڳورن ۽ چئني خليفن سميت مقدس شخصيتن خلاف توهين آميز لفظ استعمال ڪرڻ تي سزا ٽن سالن مان وڌائي گهٽ ۾ گهٽ 10 سال ڪرڻ جو بل منظور ڪيو ويو آهي. فوجداري قانون (ترميمي) بل 2023ع جي عنوان سان، بل قومي اسيمبلي ۾ جنوري ۾ صرف 15 قانون سازن جي موجودگي ۾ منظور ڪيو. فيبروري ۾ انساني حقن واري وفاقي وزير رياض حسين پيرزادا وزيراعظم شهباز شريف کي ترميمن کي ڪالعدم قرار ڏيڻ جي تجويز ڏني هئي، جنهن ۾ چيو ويو هو ته انهن جو مقصد هڪ مخصوص گروهه کي راضي ڪرڻ هو ۽ اهي “پارلياماني ضابطن کي پورو ڪرڻ کانسواءِ” منظور ڪيا ويا. وزيراعظم کي لکيل خط ۾ رياض پيرزادا چيو ته مذهبي اقليتن جو تحفظ ڪرڻ رياست جو فرض آهي ڇاڪاڻ ته اهو اسلامي حڪم سان گڏوگڏ آئيني فرض به آهي. خط ۾ چيو ويو آهي ته اقليتن پارلياماني معاملن ۾ سٺي عمل کي نظر انداز ڪرڻ تي خدشن جو اظهار ڪيو آهي، جنهن جو مقصد مخصوص گروهه کي نشانو بڻائڻ بجاءِ ٽيڪنيڪل خاميون دور ڪرڻ آهي. ڇهن مهينن کانپوءِ مسلم ليگ (ن) جي سينيٽر حافظ عبدالڪريم اهو بل سومر ڏينهن سينيٽ ۾ پيش ڪيو، جيڪو منظور ڪيو ويو، سينيٽ جي ايجنڊا ۾ جماعت اسلامي جي سينيٽر مشتاق احمد جو به ذڪر آهي، جنهن بل پيش ڪيو.
