آرٽس ڪائونسل آف حيدرآباد کي ڪيترن ئي مهينن بعد رجسٽريشن ملي وئي، آرٽس ڪائونسل تمام جلد پنهنجين سرگرمين جي شروعات ڪندي. ترجمان پاران پڌرائيءَ ۾ ڄاڻايو ويو ته آرٽس ڪائونسل آف حيدرآباد جو بنياد گذريل سال وڌو ويو هو، جنهن جي رجسٽريشن لاءِ تصديقي عمل ڊسمبر 2022ع کان جاري هو ۽ هاڻ مڪمل ٿي چڪو آهي، آرٽس ڪائونسل آف حيدرآباد هاڻ هڪ رجسٽرڊ اداري جي حيثيت ۾ ڪم ڪندي، گورننگ باڊي ۾ علم، ادب، ثقافت، مصوري، موسيقي، ميڊيا، ڊرامن ۽ پرفارمنگ آرٽ سان لاڳاپيل نامور شخصيتن کي شامل ڪيو ويو آهي. جڏهن ته ميمبرشپ جلد شروع ڪئي ويندي، اداري جي شروعاتي باڊي ۾ 7 عهديدار ۽ 10 گورننگ باڊي ميمبر کنيا ويا آهن، جن ۾ صدر ڊاڪٽر اسحاق سميجو، سينيئر نائب صدر عرفان قريشي، نائب صدر سيد زوار نقوي، جنرل سيڪريٽري نصير مرزا، جوائنٽ سيڪريٽري مرزا سليم بيگ، خزانچي علي دوست عاجز ۽ پريس ترجمان وسيم خان شامل آهن. جڏهن ته گورننگ باڊي جي ميمبرن ۾ جامي چانڊيو، ڀائي خان شر، سيد علي عباس، سيف سميجو، ناز سهتو، رفيق عيساڻي، پشپا ڪماري، ڊاڪٽر نويدا ڪٽپر، خالد عمران ۽ منظور ميراڻي شامل آهن. ترجمان موجب آرٽس ڪائونسل آف حيدرآباد هلندڙ مهيني کان ئي پنهنجي سرگرمين جي شروعات ڪندي، جنهن ۾ اسٽيج ڊراما، ادبي ۽ ثقافتي ميلا، حيدرآباد جي تاريخ ۽ ورثي تي سيمينار ۽ ڪانفرنسون، حيدرآباد جي آرٽسٽن سان شامون، مشاعرا، ادبي ويهڪون، مباحثا، نامور شخصيتن سان مڪالما ۽ مصوريءَ جون نمائشون شامل آهن، جڏهن ته هن پليٽ فارم تان فنڪارن ۽ هنرمندن جي هر قسم جي واهر ۽ سهائتا پڻ ڪئي ويندي.
