سنڌ جي وڏي وزير سيد مراد علي شاهه ورلڊ بينڪ جي ڪراچي نيبر هوڊ امپروومينٽ پروجيڪٽ (KNIP) تحت 1 ڏهائي 9 ارب رپين جي لاڳت سان تعمير ڪيل بلوچ مجاهد فٽبال گرائونڊ ۽ ڪميونٽي سينٽر جو افتتاح ڪيو. ابراهيم حيدري هڪ تاريخي ڳوٺ آهي، جيڪو سمنڊ ڪناري واقع آهي، هڪ جديد ترين فٽبال گرائونڊ، هڪ اپ گريڊ ٿيل ڪميونٽي سينٽر کي انفرااسٽرڪچر ترقي سان ٻيهر تعمير ڪيو ويو آهي. ان موقعي تي ميئر ڪراچي مرتضيٰ وهاب، ڊپٽي ميئر سلمان مراد، ايم اين اي آغا رفيع الله، ايم پي اي محمود عالم ڄاموٽ ۽ ٻيا پڻ موجود هئا. ان موقعي تي وڏي وزير چيو ته منصوبو نوجوانن جي ڀلائي کي وڌائڻ ۽ ايندڙ نسلن جي ترقي، صحتمند سرگرمين ۾ فعال ۽ ملڪ جي ترقي ۾ سندن ڪردار کي ترجيح ڏيڻ جي حڪومتي پاليسي واري عزم جو حصو آهي. سنڌ جي وڏي وزير چيو ته ابراهيم حيدري جي اپ گريڊيشن ڪراچي نيبر هوڊ امپروومينٽ پراجيڪٽ (KNIP) ذريعي ممڪن ٿي آهي، جنهن جو مقصد سڄي ڳوٺ جي ڳتيل آبادي کي ترقي ڏيارڻ آهي. وڏي وزير چيو ته هن جامع منصوبي ۾ نون روڊن جهڙوڪ عمر ڪالوني روڊ جي تعمير، مکيه روڊن ۽ گهٽين کي ويڪرو ڪرڻ ۽ پاڙن کي ڳنڍيندڙ گهٽين جي تعمير ۽ عوامي هنڌن جي ترقي شامل آهي. پروجيڪٽ ۾ فٽبال گرائونڊ جي ڪارڪردگي کي بهتر بڻائڻ تي پڻ ڌيان ڏنو ويو آهي، رات جي وقت کيڏڻ جي صلاحيت کي فعال ڪرڻ لاءِ نون فلڊ لائيٽنگ ٽاورز سميت LED لائٽون لڳايون ويون آهن. وڏي وزير مراد علي شاهه ميڊيا سان ڳالهائيندي چيو ته ڪراچي ۾ لڳ ڀڳ 5 راندين جي ميدانن جو افتتاح ڪرڻ وڃون پيا، جنهن سان گڏ ڀرپاسي جي روڊن جي تعمير پڻ شامل آهي. ان کان علاوه 8 تفريحي پارڪ به ٺاهيا ويا آهن. اسان جو مقصد ڪراچي جي سمورن پاڙن کي ترقي وٺرائڻ آهي ته جيئن ٻارن کي بجاءِ ڪنهن ٻئي هنڌ وڃڻ جي پنهنجن ئي پاڙن ۾ راند کيڏي سگهن. وڏي وزير ابراهيم حيدري جي ماڻهن کي مبارڪباد ڏيندي چيو ته فٽبال گرائونڊ سان گڏ ووڪيشنل ٽريننگ پڻ ٺاهيو ويو آهي. ان موقعي تي جيالن وڏي وزير جي خطاب جو جئي ڀٽو – وزيراعظم بلاول ڀٽو ۽ جئي وڏو وزير مراد علي شاهه جي نعرن سان جواب ڏنو. هن چيو ته عالمي بئنڪ جي سهڪار سان هڪ ٻيو وڏو منصوبو تيار آهي جنهن کي لوڪل ڪائونسل ڏسندي. سنڌ جي وڏي وزير جو چوڻ هو ته ڪجهه ڏينهن اڳ جڏهن مان سامونڊي طوفان جو جائزو وٺڻ لاءِ اتان لنگهيس ته ٻاهران گرائونڊ جو نظارو ڏٺو هو، پر اڄ اندر اچي ڏٺم ته دل ٿي ڪري ته آئون به فٽبال کيڏان. هن چيو ته چيئرمين بلاول ڀٽو جي هدايتن تي صوبائي حڪومت، ڪي ايم سي ۽ سنڌ جون سموريون ضلعي ڪائونسلون عوام جي خدمت ڪري رهيون آهن. هن چيو ته ملڪ ۾ ليڊر صرف بلاول ڀٽو آهي ڇوته اسان جي اڳواڻن چيو آهي ته طاقت جو سرچشمو عوام آهي ۽ عوام جي خدمت ڪرڻي آهي. پيپلز پارٽي سان عوام جي محبت نه رڳو جاري رهندي پر اڃا به وڌندي. ميئر ڪراچي جي چونڊن بابت هڪ سوال جي جواب ۾ هن چيو ته جيڪي هارائي چڪا آهن اهي چئي رهيا آهن ته پيپلز پارٽي غير حاضر نمائندن کي ووٽ ڏياري ها. آئون کين پڇان ٿو ته جيڪڏهن اهو اسان جي هٿن ۾ هجي ها ته اسان پاڻ کي ووٽ ڇونه ڏياريون ها؟ انهن پاڻ کي (پي ٽي آئي) ووٽ ڏيڻ نه پئي گهريو، سندن بيان آهن ته هو عمران خان کي ڏسڻ به پسند نٿا ڪن. سنڌ جي وڏي وزير حافظ نعيم لاءِ چيو ته هن وڏي غلطي ڪئي ته هو عمران خان وٽ ويو، جيڪو هن ملڪ جو ناپسنديده شخص آهي، ڪراچي جو ميئر صاف ۽ شفاف طريقي سان چونڊيو ويو آهي ۽ مرتضيٰ وهاب چئن سالن لاءِ ميئر ٿيو آهي. عام چونڊن بابت سوال تي هن چيو ته صوبائي ۽ قومي اسيمبليون 13 آگسٽ تي پاڻمرادو ختم ٿي وينديون، ان کي اڳتي وڌائڻ جو ڪوبه ميڪنيزم ناهي. اسيمبليون ختم ٿيڻ کانپوءِ ٻن مهينن ۾ چونڊون ڪرايون وينديون، عام چونڊن جي تاريخ جو اعلان ڪرڻ اليڪشن ڪميشن جو ڪم آهي ۽ ٻئي ڪنهن جو ڪم ناهي. هن چيو ته ايندڙ عام چونڊن ۾ پيپلز پارٽي سمورن صوبن سميت ملڪ ۾ حڪومت ٺاهيندي.
