ڀٽ شاهه
ڀٽائي سرڪار جي 278 هين عرس مبارڪ تي مختلف شهرن مان هزارين پانڌيئڙا پوليس جي رڪاوٽن باوجود پيادل سفر ڪري درگاهه تي پهچي ويا. زائرين جيئي لطيف ۽ ڀيڄ ڀٽائي جون صدائون بلند ڪيون. ڀٽ شاهه جي سڀني داخلي رستن تي پوليس ڪنڊيدار تارون لڳائي وڌيڪ زائرين کي شهر اچڻ کان روڪي ڇڏيو ۽ ڪيتريون ئي گاڏيون واپس موٽائي ڇڏيون.
ٻئي طرف ڀٽ شاهه پوليس ڪراڙ ڍنڍ تي ڪجهه دڪانن کي ڊاهي پٽ ڪري ڇڏيو.
صوبائي صلاحڪار مذھبي معاملا عشر ۽ زڪوات فياض احمد ٻٽ ڀٽ شاهه پهچي اوقاف کاتي جي سيڪريٽري بخش علي مهر، چيف ايڊمنسٽريٽر زاهد حسين شر، ڊي سي مٽياري مرتضيٰ علي شاهه ۽ مئنيجر اوقاف جميل احمد انصاري سان گڏجي مزار تي چادر چاڙهي. هن شاهه جو راڳ ٻڌي درگاهه جي احاطي ۾ اوقاف کاتي غريب ۽ مستحق عورتن ۾ ڪپڙا ورهايا. صوبائي صلاحڪار فياض علي ٻٽ چيو ته شاھه لطيف پوري عالم کي امن ۽ ڀائيچاري جو درس ڏنو آھي، ڪروبا سبب عرس جون تقريبون ملتوي ڪيون ويون آهن.
ٻي طرف ايم پي اي هير سوهو به درگاهه تي حاضري ڀري مزار تي چادر چاڙهي.
