سامارو: خاصخيلي راڄوڻي اتحاد جو سربراهه غلام مرتضى عرف راجا خاصخيلي ڪراچي بلاول ھائوس تي ڪجھه ڏينھن اڳ پ پ ۾ شموليت ڪرڻ بعد ڪراچي کان گاڏين جي ريلي ۾ سامارو پھتو، جتي موٽرسائيڪلن، ڪارن ۽ ٻين گاڏين جي وڏي ريلي ۾ کيس شھر جو گشت ڪرائي شاهھ لطيف چوڪ آندو وي، جتي غلام مرتضى خاصخيلي عرف راجا خاصخيلي جلسي کي خطاب ڪندي چيو ته وڏي عرصي کان خاصخيلي راڄوڻي اتحاد ۾ شامل خاصخيلي برادري ۽ اتحاد ۾ شامل سمورين برادرين جي خواھش ھئي ته آئون پ پ ۾ شامل ٿي وڃان، ان ڪري عوام جي خواھش تي پ پ ۾ شموليت ڪئي. ھن چيو ته پ پ منھنجو گھر آھي، آئون پنھنجي گھر ۾ آيو آھيان. منھنجي خاندان جي وڏن جو پ پ ۾ رت ست شامل آھي. 1970ع ۾ منھنجي ڏاڏي حاجي غلام رسول خاصخيلي وٽ شھيد ذوالفقار علي ڀٽو سامارو آيو ۽ ڏاڏي کيس ٿرپارڪر جو دورو ڪرايو. ھن چيو ته بلدياتي اليڪشن ۾ پ پ جي نامزد اميدوارن کي اليڪشن ۾ کٽرائي سرخرو ڪيو ويندو. ھاڻي سڄي سنڌ مان ضلعي عمرڪوٽ کي پ پ جو مضبوط قلعو بڻايو ويندو. ضلعي جي پ پ جي سينيئر اڳواڻن نواب يوسف ٽالپر، مير منور ٽالپر، سردار شاهھ ۽ نواب تيمور ٽالپر سان گڏجي پارٽي لا ڪم ڪيو ويندو.
