اسلام آباد :پرڏيهي وزير بلاول ڀٽو زرداري چيو آهي ته ڪير به بندوق جي زور تي ڳالهيون نٿو ڪرائي سگهي، ڊائيلاگ سياسي جماعتن جو ڪم آهي. اها بندوق 3-2 جو اقليت جو فيصلو آهي، هو اڪثريت ڏيکاري زبردستي اسان تي مڙهڻ جي ڪوشش ڪري رهيا آهن.ڪالهه اسلام آباد ۾ پريس ڪانفرنس ڪندي بلاول ڀٽو زرداري چيو ته هڪ صوبي ۾ چونڊون اڳ ۾ ٿي وڃن ته اثر باقي ٽن صوبن تي پوندو، ون يونٽ پاليسي لاڳو ڪرڻ جي سازش ڪئي پئي وڃي. مسئلن جو حل نه نڪتو ته وفاق ۽ جمهوريت کي خطرو آهي. هن چيو ته اسان جو موقف آهي ته چونڊون وقت تي ٿيڻ گهرجن، 90 ڏينهن جي آڙ ۾ چونڊون ڪرائڻ سازش آهي. اسان ڪالهه به ون يونٽ خلاف هئاسين ۽ اڄ به آهيون، ون يونٽ لاڳو ڪرڻ لاءِ بيڪ ڊور سازش ڪئي پئي وڃي. سندس چوڻ هو ته ملڪ ۾ سياسي استحڪام هوندو ته معاشي استحڪام ٿيندو، عام ماڻهو کي عدالتي بئنچ يا سياسي جماعتن جي بيانن ۾ دلچسپي ناهي، اهي تڪليف ۾ آهن، اسان ڪوشش ڪري رهيا آهيون ته عام ماڻهو کي مسئلن مان ڪڍون. بلاول ڀٽو زرداري چيو ته سپريم ڪورٽ جو عوام سامهون ٽرائل هلي رهيو آهي، عدالت ۾ جيڪو ٿي رهيو آهي اهو افسوسناڪ آهي. اسان جي تاريخ ۾ عدليا ۾ ايتري ورهاست نه ٿي، اميد ته چيف جسٽس پنهنجي راءِ ۾ اتحاد قائم ڪري عهدو ڇڏي ڏيندو. پ پ چيئرمين چيو ته سپريم ڪورٽ هڪ قانوني فورم آهي، پارليامينٽ سياسي فورم آهي، چاهيون ٿا ته هر اداري جي عزت ڪئي وڃي، پارليامينٽ جي عزت تي ڪا سوديبازي نه ٿيندي. مان پنهنجي اتحادين کي ڳالهين لاءِ ڪيئن قائل ڪندس جيستائين سپريم ڪورٽ جي فيصلي کي رد نه ڪيو وڃي؟ توهان بندوق جي زور تي ڳالهين تي اتفاق راءِ جي اميد نٿا رکي سگهو ۽ جيڪڏهن ڳالهيون ٿينديون ته، ڇا اهي ڪامياب وينديون. پرڏيهي وزير چيو آهي ته ڪجهه عنصرن جي ضد سبب جيڪڏهن پهرين ڪنهن صوبي خاص ڪري پنجاب ۾ چونڊون ڪرائڻ تي مجبور ڪيو ويو ته ان جا نتيجا سنڌ، بلوچستان ۽ خيبرپختونخواهه تي اثرانداز ٿيندا. پرڏيهي وزير چيو ته ملڪ جي لڳ ڀڳ سمورين سياسي پارٽين کي اعتراض آهي ته ملڪ ۾ ون يونٽ لاڳو ڪرڻ جي اها سازش پوئين دروازي کان ڪئي پئي وڃي، ان ڪري اسان ڪافي عرصي کان اتحادين کي ڳالهين لاءِ قائل ڪرڻ جي ڪوشش ڪري رهيا آهيون. جيڪڏهن اسان کي سياسي مخالفن سان ڳالهيون ڪرڻيون آهن ته انهن سان به ڳالهيون ڪيون وينديون ته اسان سڀ ملڪ ۾ هڪ ئي ڏينهن چونڊون ڪرائڻ جي حق ۾ آهيون. اڄ به اسين سمجهون ٿا ته جيڪڏهن اهي مسئلا حل نه ڪيا ويا ته جمهوريت ۽ وفاق کي سخت خطرو آهي. هن چيو ته عيد کان پوءِ اسان جو اعليٰ سطحي اجلاس ٿيندو جنهن ۾ ان معاملي تي حتمي فيصلو ڪيو ويندو، اهو ڏکيو ٿيندو ڇو ته عدليا هڪ قانوني فورم آهي ۽ سينيٽ سياسي فورم آهي، تنهن ڪري جيڪڏهن ڳالهيون سينيٽ ۾ ٿيون. ۽ سياسي پارٽين جي وچ ۾ اتفاق راءِ تي پهچڻ آسان ٿي ويندو.
