پاڪستان وائيٽ واش نه ڪري سگهيو، ون ڊي ۾ پهرين پوزيشن کان به محروم، ڪيويز آخري مئچ ۾ ڪامياب

پاڪستان جي ٽيم نيوزيلينڊ کي ون ڊي سيريز ۾ وائيٽ واش نه ڪري سگهي، آخري مئچ ۾ ڪيوي ٽيم 300 رنسون ٺاهي پاڪستان کي 252 رنسن تي قابو ڪري ورتو، افتخار جون 94 رنسون ۽ سلمان علي آغا جي ففٽي به 47 رنسن تان مليل شڪست ٽاري نه سگهي. ان کان اڳ ڪراچي ۾ ون ڊي سيريز جي کيڏيل آخري مئچ ۾ نيوزيلينڊ جي ڪپتان ٽام ليٿم ٽاس کٽي پاڪستان کي بالنگ جي دعوت ڏني ته ڪيوي ٽيم 50 هين اوور ۾ 299 رنسون ٺاهي آئوٽ ٿي وئي، ول ينگ 87 ۽ ڪپتان ٽام ليٿم 59 رنسن سان نمايان رهيا. پاڪستان آخري مئچ ته نه کٽيو پر ون ڊي سيريز جي ٽرافي 1-4 تان اڳواٽ کٽي چڪو هو، جڏهن ته ون ڊي جي عالمي رينڪنگ ۾ پاڪستان کان پهرين پوزيشن ٻن ڏينهن اندر کسجي وئي، آسٽريليا جي ٽيم ٻيهر پهريون نمبر حاصل ڪري ورتو، جڏهن ته هاڻي بابر اعظم اليون کي ٽيون نمبر نصيب ٿيو آهي.