ڪراچي: سنڌ جي وڏي وزير سيد مراد علي شاهه هڪ ڀيرو ٻيهر ڪراچي سرڪلر ريلوي منصوبي جو آغاز ڪري ڇڏيو آهي ۽ بورڊ آف روينيو کي هدايت ڪئي آهي ته هو پنهنجي زمين جا سمورا مسئلا حل ڪري ته جيئن وڌيڪ ڪاروائي لاءِ چيني اختيارين ۽ وفاقي حڪومت سان گڏيل ورڪنگ گروپ جوڙي سگهجي. اهڙو اظهار هن وزيراعليٰ هائوس ۾ ٿيل اجلاس ۾ ڪيو، جنهن ۾ اطلاعات ۽ ٽرانسپورٽ واري صوبائي وزير شرجيل ميمڻ ۽ ٻين شرڪت ڪئي. ٽرانسپورٽ واري وزير شرجيل ميمڻ وڏي وزير کي بريفنگ ڏيندي چيو ته پي ٽي آءِ جي حڪومت ۾ ڪي سي آر منصوبي کي ترجيح نه ڏني وئي، شهر جي ٽرانسپورٽ وارن مسئلن جي حل لاءِ هيءَ منصوبو سڀ کان اهم آهي.
ٽرانسپورٽ واري وزير چيو ته اٽڪل 40 ايڪڙ زمين جو مسئلو آهي، جنهن لاءِ ريلوي اختيارين متبادل زمين حاصل ڪرڻ چاهي ٿي. وڏي وزير سينيئر ميمبر بورڊ آف روينيو بقا الله انڙ کي هدايت ڪئي ته ريلوي اختياريون جيڪا زمين رکڻ چاهين ٿيون يا ان جو متبادل تيار ڪري انهن کي رپورٽ ڪري. ٽرانسپورٽ واري وزير وڏي وزير کي ٻڌايو ته منظور ٿيل پلان موجب ڪي سي آر وٽ 43 ڏهائي 2 ڪلوميٽر روٽ آهي جنهن ۾ 25 ڏهائي 51 ڪلوميٽر ايليوٽڊ ۽ 17 ڏهائي 7 ڪلوميٽر گريڊڊ آهي.
هن وڌيڪ چيو ته ان ۾ 24 اسٽيشن هوندا جن مان 13 ايليوٽيٽڊ ۽ 11 گريڊ جا آهن. شرجيل ميمڻ چيو ته ڪي سي آر ٻٽو ٽريڪ هوندو جنهن ۾ 162 ٽرين سيٽون هونديون. وڏي وزير چيف سيڪريٽري کي هدايت ڪئي ته ڪي سي آر جا سمورا دستاويز مڪمل ڪيا وڃن ۽ پلاننگ ڪميشن جي وزير سان ڳالهه ٻولهه ڪئي وڃي ته جيئن چيني اختيارين سان رابطو ڪري گڏيل ورڪنگ گروپ ٺاهيو وڃي ته جيئن ان کي شروع ڪري سگهجي.
