مٺي: ڊي سي ٿرپارڪر لعل ڏنو منگي سامونڊي طوفان واري برسات جي ضلعي ۾ ٿيل نقصان بابت درٻار هال مٺي ۾ پريس ڪانفرنس ڪندي چيو آھي ته سامونڊي طوفان وارين برساتن ۾ ٿر اندر ڪوبه جاني نقصان نه ٿيو آھي، چوپايو مال مرڻ سان گڏ هزارين ڪچا گهر ڊٿا ۽ متاثر ٿيا آھن، ٿر ۾ ٿيل معاشي نقصان جي سروي ٻن ڏينهن ۾ مڪمل ڪري انگ اکر جاري ڪنداسين ۽ سنڌ سرڪار کي ان جي ازالي لا لکنداسين. ٿر ۾ هزارين ڪچن گهرن جو نقصان ٿيو آھي ۽ سوين چوپايو مري ويو آھي، هن وقت حتمي انگ اکر نٿا ٻڌائي سگهون. ٿر جي شھرن ۾ ڊرينيج نظام بهتر ناهي، ان ڪري هر ڀيري شھرن مان برساتي پاڻي نيڪال ڪرڻ ۾ مسئلو ٿئي ٿو، اسان وٽ اي ڊي پي جا فنڊ وڌ ۾ وڌ روڊن تي خرچ ڪري باقي اسڪيمن کي نظرانداز ڪيو وڃي ٿو، برسات ۾ روڊ ۽ خاص طور ڪول ايريا وارو مک روڊ به ڪافي هنڌن کان اکڙي ويو آھي، طوفاني برساتن جي متاثرن جي رليف لا سنڌ سرڪار وٽان فنڊ جاري نه ٿيو آھي، صرف ريسڪيو آپريشن لا فنڊ جاري ٿيا آھن، ٿر جي مڪمل ڊهي ويل گهرن جي متاثرن کي تنبو ۽ راشن پهچائي رهيا آھيون، پاڪ آرمي به رليف جي ڪم ۾ هٿ ونڊائي رهي آھي، ايس ايس پي زاهده پروين سميت سمورن کاتن ڀرپور ڪردار ادا ڪيو. هن چيو ته ٿر ۾ 28 جون کان ٻيهر برساتون پوڻ جا امڪان آھن. ان موقعي تي فوڪل پرسن اي ڊي سي ٽو سنجه ترڪيو ۽ ٻيا موجود هئا.
