ڪرمپور: ناپرڪوٽ ٿاڻي جي حد انڊس ھائي وي تي ڌاڙيلن ڪاهھ ڪري مزدا گاڏي تي فائرنگ ڪئي هئي، جنهن جي نتيجي ۾ بھادر خان بگٽي ۽ علي خان بگٽي قتل ٿي ويا ۽ عبدالواحد بگٽي زخمي ٿي پيو. ڌاڙيل ٻن ڄڻن احمد حسين ۽ محمد حسين کي اغوا ڪري ويا ھئا، مقتولن سان انصاف ۽ مغوين جي بازيابي لا بگٽي برادري 2 ڏينهن کان ڪرمپور ڀرسان ناپرڪوٽ ٿاڻي جي حد ۾ ڌرڻو هڻي روڊ بلاڪ ڪيو. بعد ۾ شڪارپور، جيڪب آباد ۽ سکر روڊ تي پڻ ڌرڻا هنيا ويا، جيڪو احتجاج مسلسل ٻن ڏينهن کان جاري هو. جنھن ۾ بگٽي برادري جا چڱا مڙس جلال خان ڪلپر بگٽي، لياقت بگٽي، گھرام خان بگٽي ۽ ٻيا چڱا مڙس ۽ سوين ماڻهو شريڪ ٿيا. جڏهن ته 4 ڏينهن بعد شڪارپور پوليس مبينا مقابلي دوران ٻنهي مغوين احمد حسين ۽ محمد حسين کي بازياب ڪرائڻ جي دعويٰ ڪئي آھي. جڏھن ته مقابلي ۾ ڪو به ڏوھاري گرفتار نه ٿي سگهيو. 4 ڏينهن گذرڻ باوجود واقعي جو ڪيس به داخل نه ٿي سگھيو آھي. ھوڏانھن مغوين جي بازيابي تي بگٽي برادري ۾ خوشي جي لھر ڇانيل آھي. ايس ايس پي آفيس مان مغوين کي وارثن حوالي ڪيو ويو، جنھن بعد مغوي احمد حسين بگٽي ۽ محمد حسين بگٽي کي لکي غلام شاهھ نيشنل ھائي وي تي لڳل ڌرڻي تي آندو ويو، جنھن بعد ڌرڻو ختم ڪري بگٽي برادري جا ماڻهو ڊيرا بگٽي روانا ٿي ويا.
