لاڙڪاڻي جي مراد واهڻ پاڙي جي رهواسڻ معصوم ٻارڙن سان گڏجي پاڪ ڪتاب کڻي نوجوان پٽ جي خون سان انصاف نه ٿيڻ ۽ جوابدار ڌر پاران ڪيس داخل ڪرائڻ خلاف پريس ڪلب اڳيان احتجاج ڪيو. ان موقعي تي شبانه خاتون بروهي معصوم نياڻي صبا ۽ ڀائٽي راجا بروهي سان گڏجي دانهيندي چيو ته گهر اڳيان ويهڻ کان منع ڪرڻ تان 13 آگسٽ تي ليڊي اهلڪار ارجمه شاهين جسڪاڻي ۽ سندس ڀائرن حملو ڪري نوجوان پٽ سمير بروهي کي قتل ڪري ڇڏيو، واقعي جو ڪيس دڙي ٿاڻي تي داخل ڪرايو، پوليس صرف ٻن جوابدارن عدالت ۽ نظير جسڪاڻي کي گرفتار ڪري جيل اماڻي ڇڏيو، مک جوابدار ليڊي اهلڪار ۽ سندس ڀائرن کي پوليس هن مهل تائين گرفتار ناهي ڪيو. هن چيو ته نوجوان پٽ قتل ڪري جهولي خالي ڪئي وئي آهي، مسلسل احتجاج باوجود ڪنهن نوٽيس ناهي ورتو.
