وزيراعظم شهباز شريف ملڪ ۾ مهانگائي جو اعتراف ڪندي چيو آهي ته ان ڳالهه ۾ ڪو شڪ ناهي ته مهانگائي عروج تي ۽ عوام ڀوڳي رهيو آهي، ٻوڏ کانپوءِ ملڪ ۾ خوراڪ جي کوٽ ڪر کنيو آهي، سنڌ ۽ بلوچستان ۾ زراعت کي ڪاپاري ڌڪ لڳو آهي، ٻوڏ متاثرن جي بحاليءَ لاءِ اربين ڊالر گهرجن، عالمي برادري جي مدد سان ٻوڏ متاثرن کي بحال ڪنداسين. بلوچستان جي ٻوڏ متاثر علائقن زوب ۽ صحبت پور جو دورو ڪرڻ بعد ميڊيا سان ڳالهائيندي وزيراعظم چيو ته اسان انتهائي ڏکين حالتن ۾ حڪومت سنڀالي هئي، اڳوڻي حڪومت جي غلط پاليسين سبب عوام مهانگائي ۽ ٻيا عذاب ڀوڳي رهيو آهي، ان وقت آءِ ايم ايف سان معاهدو ٽٽي چڪو هو ۽ مهانگائي عروج تي هئي پر ان باوجود وفاق ٻوڏ متاثرن لاءِ 100 ارب رپيا خرچ ڪيا ۽ اڃا به ٻوڏ متاثرن لاءِ سوين ارب رپين جي ضرورت آهي. هن چيو ته ٻوڏ متاثرن کي گهرن لاءِ معاوضو ڏيڻ جي ڳالهه ذهن ۾ ايندي هئي ته رات جو ننڊ نه ايندي آهي، 10 لک گهر پاڻي ۾ تباهه ٿي ويا. انشا الله اسان متاثرن کي معاوضو ڏينداسين. ٻئي طرف صحبت پور ۾ تقريب کي خطاب ڪندي شهباز شريف چيو ته ٻوڏ سبب سڄو صحبت پور ضلعو پاڻي ۾ ٻڏل هو، هتي پاڻي ۽ خوراڪ پهچائڻ آسان ڪم نه هو اڄ صحبت پور جو هي علائقو ڏسي سڪون ملي ويو، سنڌ جو ميداني ۽ بلوچستان جو جابلو علائقو پاڻي ۾ ٻڏل هو، ڊپ لڳندو هو ته متاثرن جي ڪهڙي ريت مدد ڪنداسين. هن چيو ته 9 جنوري تي گڏيل قومن جي سيڪريٽري جنرل سان گڏ جنيوا ۾ ڊونرز ڪانفرنس جي سربراهي ڪندس، ان سلسلي ۾ پاڙيسري ملڪن کي ڪانفرنس ۾ شرڪت جي دعوت ڏئي رهيو آهيان، ملائيشيا جي وزيراعظم سان به ڳالهه ٻولهه ٿي آهي، پاڪستان کي پنهنجي پيرن تي بيهارڻ لاءِ اسان کي پاڻ همت ڪرڻي پوندي.
