ڪراچي: سنڌ ۾ سينيئر آفيسرن کي عهدن تان هٽائڻ واري معاملي تي پ پ خدشا ظاهر ڪري ڇڏيا. پيپلز پارٽي جي وفد نگران وزيراعظم وٽ پهچي کيس دانهن ڏيندي خدشن کان آگاهه ڪيو. پيپلزپارٽي جي وفد نگران وزيراعظم انوار الحق ڪاڪڙ سان ملاقات ڪئي ۽ پنهنجن خدشن کان کيس آگاهه ڪيو. پيپلزپارٽي جي اڳواڻن نثار کهڙو، مراد شاهه، نويد قمر، سعيد غني ۽ مرتضيٰ وهاب وفد جي صورت ۾ نگران وزيراعظم سان ملاقات ڪئي، جنهن دوران پ پ جي وفد سنڌ صوبي ۾ آفيسرن جي بدلين ۽ مقررين تي خدشا ظاهر ڪيا. ملاقات بعد ميڊيا سان ڳالهائيندي نثار کهڙي چيو ته نگران وزيراعظم کي مقررين ۽ بدلين بابت پنهنجن خدشن کان آگاهه ڪيو آهي. پ پ اڳواڻن موجب نگران وزيراعظم يقين ڏياريو ته سنڌ ۾ ترقياتي منصوبا جاري رهندا. شهيد مير مرتضيٰ ڀٽو ڪيس ٻيهر کلڻ بابت سوال جي جواب ۾ نثار کهڙو چيو ته عدالتون آزاد آهن، سنڌ هائي ڪورٽ مرتضيٰ ڀٽو قتل ڪيس 14 سالن کانپوءِ ٻيهر اوپن ڪيو آهي، اسان عدالتن جي آزاديءَ جا حامي آهيون.
