ڪراچي (بيورو رپورٽ)پيپلزپارٽي پارليامينٽرينز جي مرڪزي اطلاعات سيڪريٽري ۽ ميمبر قومي اسيمبلي شازيا عطا مري چيو آهي ته ملڪ ۾ جيڪڏهن اڳوڻي صدر آصف علي زرداري جون پاليسيون برقرار هجن ها ته ملڪ جو اھو حال نه هجي ها ۽ پاڪ ايران گيس پائيپ لائين منصوبي کي ختم ڪندي ملڪ سان دشمني ڪئي وئي. اهڙن خيالن جو اظهار هن جاري ڪيل بيان ۾ ڪيو آهي. هن چيو ته آصف علي زرداري جي حڪومت واري دور ۾ سمورا فيصلا پارليامينٽ ذريعي ڪيا ويندا ھئا، جڏهن ته هن وقت ملڪ ۽ قوم جي قسمت جو فيصلو اڻ چونڊيل ماڻهو ڪري رهيا آهن. شازيا مري وڌيڪ چيو ته ملڪ جي معيشت کي تباهه ڪرڻ ۾ نيب جو اهم ڪردار آهي ۽ اميد آهي ته ھاڻ امپائر عمران خان جي نااهلي مان مطمئن هوندو. هن چيو ته ملڪ ۾ وڌندڙ مهانگائي سبب غريب ماڻهو بک ڪاٽڻ تي مجبور آهن. ھن چيو ته نااهل وزيراعظم مان ڇوٽڪاري جو واحد علاج سندس خلاف تحريڪ عدم اعتماد جي رٿ آڻڻ آهي.
