اسلام آباد (رپورٽ: حسيب حنيف) سينيٽ اجلاس ۾ پيٽروليم شين جي قيمتن ۾ واڌ ۽ عمران خان خلاف مولانا عطا الرحمان جي رمارڪس تي مخالف ڌر واڪ آئوٽ ڪري ڇڏيو. اپوزيشن چيئرمين ڊائيس جو به گھيرو ڪيو ۽ ايوان ۾ سخت نعريبازي پڻ ڪئي وئي. اجلاس ڪورم پورو نه ٿيڻ سبب ملتوي ڪرڻو پيو. ڪالهه سينيٽ ۾ ڳالهائيندي مخالف ڌر جي اڳواڻ ڊاڪٽر شهزاد وسيم چيو ته سندس پارٽي کان بهتر ڪير ڄاڻي ٿو ته پاڪستان جي تاريخ ۾ ان کان اڳ هڪ ڀيرو اڪثريت کي اقليت ۾ تبديل ڪرڻ جي ڪوشش ڪئي وئي. ملڪ کي نقصان پهچايو ويو، حڪومت جي هي بجيٽ آ ايم ايف جي غلامي آهي. آءِ ايم ايف سان پنهنجا ڪيس ختم ڪرڻ لاءِ ڊيل ڪئي وئي آهي. هاڻي اهي اليڪشن ڪميشن ۽ ادارن کي پسند ڪن ٿا. اڪثريت کي طاقت جي زور تي اقليت ۾ نه بدلايو، هاڻي وقت اچي ويو آهي ته توهان اليڪشن ڪرايو. اجلاس ۾ ڊاڪٽر شهزاد وسيم چيو ته ناڻي وارو وزير ڪٿي آهي، اهي ڪهڙي ٻر ۾ لڪيل آهن؟ آءِ ايم ايف جو نمائندو ڪٿي آهي؟ ان دوران ايوان ۾ گوڙ ڪيو ويو ۽ اپوزيشن چيئرمين ڊائس جو گهيرو ڪيو، اپوزيشن پيٽروليم شين جي اگهن ۾ واڌ تي سخت نعريبازي ڪئي. مخالف ڌر پيٽروليم شين جي اگهن ۾ واڌ تي ايوان مان واڪ آئوٽ ڪري ڇڏيو. جڏهن ته سينيٽ چيئرمين دانش ڪمار ۽ بهرام تنگي کي اپوزيشن کي پرچائڻ جي هدايت ڪئي. مخالف ڌر جا ميمبر ٽوڪن واڪ آئوٽ کانپوءِ ايوان ۾ واپس آيا. سينيٽر عرفان صديقي چيو ته تاريخ ۾ اهڙي ڪا به حڪومت نه هوندي جنهن ۾ ڪنهن جا هٿ نه ٽوڙيا ويا هجن ۽ نه ئي ڪنهن خلاف سازش ڪئي وئي هجي، کين هر درد جي دوا ڏني وئي. مان اهو چوڻ نٿو چاهيان ته فوج ڇا چئي رهي آهي ۽ خان صاحب ڇا پيو چوي. پر هن بجيٽ جي پويان هڪ تاريخ آهي، جيڪڏهن اها تاريخ نه هجي ها ته ملڪ جا 9 ارب ڊالر نه هجن ها. ذوالفقار علي ڀٽي خلاف اقتدار ڇڏڻ کان پوءِ تخت دار تي وڃڻ جي سازش نظر اچي رهي آهي، بينظير ڀٽو کي شهيد ڪيو ويو. لياقت علي خان کي گوليون هنيون ويون. 2016 ۾ نواز شريف جي وڃڻ کان اڳ هڪ ڪهاڻي شايع ٿي هئي ته نواز شريف شريف کي برطرف ڪيو ويندو. پيٽروليم شين جي اگهن ۾ واڌ تي حڪومت تي تنقيد ڪندي سينيٽر مشتاق احمد چيو ته گذريل 20 ڏينهن ۾ شين جا اگهه 130 رپيا ٿي ويا آهن، هي حڪومت هلاڪو خان۽ چنگيز خان بڻجي رهي آهي. هنن پاڪستان کي آ ايم ايف جو اڏو بڻائي ڇڏيو آهي. هنن 50 رڪني ڪابينا ٺاهي آهي، جيڪڏهن مهانگائي کانسواءِ ڪجهه ناهي ته پوءِ ڪابينا جي ضرورت ناهي. جنهن چانهه جو ڪوپ گهٽائڻ جو مشورو ڏنو، انهن کي چوان ٿو ته اسان کي پراڻا اگهه ڏيو، اسان کي ٻه هزار رپيا نه گهرجن، توهان ٻه هزار رکو، پراڻا اگهه واپس ڏيو. سينيٽر شبلي فراز چيو ته جيڪڏهن توهان هن بجيٽ کي بجيٽ چئو ته اها بجيٽ ناهي، هي بجيٽ اسان جي بجيٽ ناهي، اها آءِ ايم ايف جي بجيٽ آهي. توهان جيڪا بجيٽ ٺاهي آهي اها ڪينڊي لينڊ جي بجيٽ آهي. بجيٽ ۾ 750 ارب رپيا ليوي ٽيڪس به شامل آهن. اسان جي ملڪ ۾ ٻه مسئلا آهن، هڪ انرجي ۽ ٻيو پينشن جو، جيڪي قيمتون وڌيون آهن اهي ختم نه ٿيون. هن چيو ته گرمين ۾ 27 هزار ميگاواٽ بجلي جي طلب آهي، سياري ۾ اسان جي طلب 8 کان 9 هزار ميگاواٽ آهي، اڄ تائين ڪنهن به اهو نه سوچيو ته 17 کان 18 هزار ميگا واٽ بجلي کولنگ لاءِ استعمال ٿيندي آهي. پي ٽي آءِ سينيٽر اعجاز چوڌري چيو ته مان ڊي جي آءِ ايس پي آر کان پڇڻ چاهيان ٿو ته توهان کي غلط بيان ڏيڻ جي ضرورت ڇو آهي، توهان پاڻ فوج کي سياست ۾ گهيلڻ جي ڪوشش ڪريو پيا. جڏهن ته تقرير دوران سينيٽر عطاءُ الرحمان عمران خان تي سخت تنقيد ڪئي، سينيٽر عطاءُ الرحمان طرفان عمران خان کي گزيٽيڊ چور قرار ڏنو ويو، جنهن تي مخالف ڌر ايوان مان واڪ آئوٽ ڪري ڇڏيو، اجلاس اڄ صبح 10.30 وڳي تائين ملتوي ڪيو ويو.
