ڪراچي: اڳوڻي صدر آصف علي زرداري ڪارساز سانحي جي بهادر شهيدن کي خراج عقيدت پيش ڪيو آهي، ڪارساز سانحي جا 15 سال مڪمل ٿيڻ تي پنهنجي خاص پيغام ۾ آصف زرداري چيو ته جيالن بم ڌماڪن کان بي خوف ٿي پنهنجي عظيم ڀيڻ ۽ قائد جي حفاظت ڪئي. هن چيو ته اڄ محترمه بينظير ڀٽو شهيد ۽ ان جي هزارين جيالن جي رت سان جمهوريت قائم آهي، پيپلزپارٽي عهد ڪري ٿي ته ڀلي ڇا به ٿئي جمهوريت قائم ۽ دائم رهندي. هن چيو ته پ پ محترمه بينظير ڀٽو شهيد جو مشن مڪمل ڪري 1973 جي آئين کي اصل صورت ۾ بحال ڪيو، 18 هين آئيني ترميم ملڪ جي سلامتي ۽ بقا جي ضمانت آهي.
هن چيو ته پ پ سوات ۾ ٻيهر قومي پرچم سر بلند ڪيو، صوبن کي خودمختياري ڏني، گلگت بلتستان ۽ ڪي پي ڪي جي عوام کي سڃاڻپ ڏني، غريب ۽ مستحق عورتن کي بينظير انڪم سپورٽ پروگرام جي ذريعي رياست جي ثمرن ۾ حصيدار بڻايو، اسان جي جدوجهد ان روشن صبح لاءِ آهي، جڏهن هر نوجوان روزگار سان هوندو. آصف زرداري چيو ته معاشي ۽ سماجي طور تي ڪمزور طبقن کي معاشي ۽ سماجي انصاف مهيا ٿيندو، اڄ ملڪ جو پٺتي پيل علائقو ٿر ڪوئلي مان بجلي پيدا ڪري رهيو آهي، هي روشني به محترمه بينظير ڀٽو شهيد جو خواب هو.
